ടോയിലറ്റിൽ സഹപ്രവർത്തകയുടെ ദൃശ്യങ്ങൾ വിവസ്ത്രനായി പകർത്തിയ ഇൻഫോസിസ് ടെക്കി അറസ്റ്റിൽ; ഫോണിൽ മുപ്പതോളം വീഡിയോകള്‍| infosys employee arrested for filming woman in campus toilet in bengaluru

ജൂണ്‍ 30ന് രാവിലെ 11ന് കമ്പനിയുടെ ഇലക്ട്രോണിക് സിറ്റി ഓഫീസിലാണ് സംഭവം നടന്നത്. ടോയിലറ്റ് ഉപയോഗിക്കുന്നതിനിടെ ഒരു നിഴല്‍ ശ്രദ്ധയില്‍പ്പെട്ടതിനെ തുടര്‍ന്ന് നടത്തിയ പരിശോധനയില്‍ അടുത്തുള്ള ക്യൂബിക്കിളില്‍നിന്ന് ഒരാള്‍ മൊബൈല്‍ ഫോണില്‍ ദൃശ്യങ്ങള്‍ പകര്‍ത്തുന്നതായി കണ്ടെത്തിയെന്നും പരാതിക്കാരി പൊലീസിനോട് പറഞ്ഞു. ഇയാള്‍ വിവസ്ത്രനായിട്ടാണ് ദൃശ്യങ്ങള്‍ പകര്‍ത്തിയിരുന്നതെന്നും പരാതിയില്‍ ആരോപിക്കുന്നു. ഉടന്‍ താന്‍ വാഷ്റൂമില്‍നിന്ന് പുറത്തേക്കിറങ്ങി ഓടി സഹപ്രവര്‍ത്തകരെ കാര്യങ്ങള്‍ അറിയിച്ചു. അവര്‍ ചേര്‍ന്ന് നാഗേഷിനെ തടഞ്ഞുവെച്ചുവെന്നും പരാതിക്കാരി വ്യക്തമാക്കി.

ഇൻഫോസിസ് എച്ച്ആർ ഉദ്യോഗസ്ഥർ ഇക്കാര്യം അന്വേഷിക്കുകയും അയാളുടെ ഫോണിൽ നിന്ന് വ്യത്യസ്ത സ്ത്രീകളുടെ 30ലധികം വീഡിയോകൾ കണ്ടെത്തുകയും ചെയ്തു. ഇരയുടെ ഭർത്താവ് സംഭവത്തെക്കുറിച്ച് അറിയുകയും ഓഫീസിലെത്തി തന്റെ രോഷം പ്രകടിപ്പിക്കുകയും ചെയ്തതോടെ സ്ഥിതിഗതികൾ വഷളായി. തുടർന്ന്, വനിതാ ജീവനക്കാരി ചൊവ്വാഴ്ച ഇലക്ട്രോണിക് സിറ്റി പോലീസ് സ്റ്റേഷനിൽ ഔദ്യോഗികമായി പരാതി നൽകി. പിന്നാലെ സ്വപ്‌നിലിനെ അറസ്റ്റ് ചെയ്തു.

“ഇന്നലെയാണ് ഞങ്ങൾ കേസ് രജിസ്റ്റർ ചെയ്തത്, ഏകദേശം 30 വയസ്സുള്ള, ടെക്നിക്കൽ അനലിസ്റ്റായി ജോലി ചെയ്തിരുന്ന പ്രതിയെ ഞങ്ങൾ ഇതിനകം അറസ്റ്റ് ചെയ്തു. മൊബൈൽ ഫോൺ ഞങ്ങൾ കണ്ടെടുത്തു, ഫോറൻസിക് പരിശോധനയ്ക്ക് അയയ്ക്കുകയാണ്.” സൗത്ത് ഈസ്റ്റ് ഡിവിഷൻ ഡിസിപി സാറ ഫാത്തിമ പറഞ്ഞു.

കൂടുതൽ സ്ത്രീകളുടെ ദൃശ്യങ്ങൾ സമ്മതമില്ലാതെ റെക്കോർഡ് ചെയ്തിട്ടുണ്ടോ എന്നും ഏതെങ്കിലും ഉള്ളടക്കം പങ്കിടുകയോ  പ്രചരിപ്പിക്കുകയോ ചെയ്തോ എന്നും അന്വേഷണ ഉദ്യോഗസ്ഥർ അന്വേഷിക്കുകയാണ്. ഡിലീറ്റ് ചെയ്ത ഫയലുകൾ വീണ്ടെടുക്കുന്നതിനായി ഫോൺ ഫോറൻസിക് ലാബിലേക്ക് അയച്ചിട്ടുണ്ടെന്നും പൊലീസ് പറഞ്ഞു.

Summary: An employee of tech giant Infosys have been arrested for allegedly secretly recording obscene videos of female colleagues in the restroom of the company’s campus in Bengaluru.