കുട്ടികളുമായി ഉല്ലാസയാത്ര പോയി വരുന്നുവെന്ന വ്യാജേന കാറിൽ ലഹരി കടത്തിയ നാലംഗസംഘം പിടിയിൽ| couple and friends arrested in kovalam for smuggling mdma and hybrid cannabis in car

കോവളം ജംഗ്ഷനിൽ വച്ച് ഡാൻസാഫ് സംഘമാണ് പ്രതികളെ പിടികൂടിയത്. നഗരത്തിലും ഗ്രാമീണ മേഖലകളിലും ഉൾപ്പടെ സംഘം ലഹരി വില്പന നടത്തിയിരുന്നതായി പോലീസ് അറിയിച്ചു. പ്രതികളെ പിടികൂടുന്ന സമയത്ത് യുവതിയുടെ കുട്ടികളും കാറിലുണ്ടായിരുന്നു. ഉല്ലാസയാത്രക്ക് പോയി മടങ്ങിവരുന്നുവെന്ന വ്യാജേനയാണ് കുട്ടികളെയും സംഘത്തിൽ ഉൾപ്പെടുത്തിയിരുന്നതെന്ന് പോലീസ് പറയുന്നു.

അതേസമയം, പ്രതികൾ സഞ്ചരിച്ചിരുന്ന കാറിൽ നിന്നും ഒളിപ്പിച്ചുവെച്ച നിലയിൽ അരക്കിലോ എംഡിഎംഎ, ഒൻപതുഗ്രാം ഹൈബ്രിഡ് കഞ്ചാവും പോലീസ് കണ്ടെടുത്തു. കാറിൽ മയക്കുമരുന്ന് കടത്തുന്നുവെന്ന രഹസ്യവിവരത്തെ തുടർന്ന് നടത്തിയ പരിശോധനയാണ് സംഘത്തെ കുടുക്കിയത്. വിവരം ലഭിച്ചത് പ്രകാരം ഡാൻസാഫ് സംഘം കോവളത്ത് മഫ്തിയിലുണ്ടായിരുന്നു. പോലീസ് പിന്തുടരുന്നുവെന്ന് മനസിലാക്കിയ പ്രതികൾ കാറുമായി രക്ഷപ്പെടാൻ ശ്രമിച്ചെങ്കിലും സാധിച്ചില്ല. ഇവർ സഞ്ചരിച്ചിരുന്ന കാറും ഡാൻസാഫ് സംഘം കസ്റ്റഡിയിലെടുത്തു.

കൊല്ലത്ത് നിന്നും മൂന്നുമാസം മുൻപ് പണയത്തിനെടുത്ത കാറാണ് സംഘം ലഹരി കടത്താൻ ഉപയോഗിച്ചിരുന്നത്. ബെം​ഗളൂരുവിൽ നിന്ന് മയക്കുമരുന്നുമായി ശ്യാമും രശ്മിയും തമിഴ്‌നാട്ടിലെ കാവല്ലൂരെത്തുകയും സുഹൃത്തുക്കളോട് കാറുമായി അവിടെ എത്താൻ ആവശ്യപ്പെടുകയുമായിരുന്നുവെന്ന് പോലീസ് പറയുന്നു. സംഭവത്തിൽ കൂടുതൽ അന്വേഷണം നടത്തി വരികയാണെന്ന് പോലീസ് അറിയിച്ചു.