ധർമസ്ഥല കേസിൽ ബിജെപി നേതാവിനെതിരെ അപകീർത്തി പരാമർശം; കര്‍മസമിതി നേതാവ് മഹേഷ് ഷെട്ടി തിമരോഡി അറസ്റ്റിൽ| Dharmasthala case Mahesh Shetty Thimarodi Arrested For Derogatory Comments Against bjp official BL Santhosh | India

വ്യാഴാഴ്ച വസതിയിൽ‌ വെച്ചാണ് പൊലീസ് മഹേഷ് ഷെട്ടിയെ അറസ്റ്റ് ചെയ്തത്. ബിജെപി ദേശീയ ഓർഗനൈസിംഗ് സെക്രട്ടറി ബി എൽ സന്തോഷിനെതിരെ സോഷ്യൽ മീഡിയയിൽ നടത്തിയ അധിക്ഷേപകരമായ പരാമർശങ്ങളുമായി ബന്ധപ്പെട്ടാണ് ഈ നടപടി. കസ്റ്റഡിയിലെടുക്കുന്നതറിഞ്ഞ് മഹേഷ് ഷെട്ടിയുടെ അനുയായികൾ വൻതോതിൽ തടിച്ചുകൂടി. ബിജെപിക്കും സംസ്ഥാന സർക്കാരിനുമെതിരെ ഇവർ മുദ്രാവാക്യം വിളിച്ചു.

“ഇത് എസ്ഐടി അന്വേഷണം അവസാനിപ്പിക്കാനുള്ള ഗൂഢാലോചനയാണ്. ഇത് ബിജെപിയുടെ നീക്കമാണ്. അവരെല്ലാം നശിപ്പിക്കപ്പെടും. ഞാൻ പോലീസിന് മൊഴി നൽകും. സൗജന്യയ്ക്ക് നീതി ലഭിക്കണം. തീർച്ചയായും നീതി നടപ്പാക്കും.” – മഹേഷ് ഷെട്ടി മാധ്യമങ്ങളോട് പറഞ്ഞു.

ബിജെപിയുടെ ഉഡുപ്പി റൂറൽ മണ്ഡൽ പ്രസിഡന്റ് രാജീവ് കുലാലിന്റെ പരാതിയെത്തുടർന്ന് ഓഗസ്റ്റ് 16 ന് ബ്രഹ്മാവർ പൊലീസ് സ്റ്റേഷനിൽ എഫ്‌ഐആർ ഫയൽ ചെയ്തു. ബി എൽ സന്തോഷിനെതിരെ മഹേഷ് ഷെട്ടി അസഭ്യം പറയുകയും വ്യത്യസ്ത സമുദായങ്ങൾക്കും മതങ്ങൾക്കും ഇടയിൽ ശത്രുത വളർത്തുകയും ചെയ്തുവെന്ന് കുലാൽ ആരോപിച്ചു. മഹേഷ് ഷെട്ടി ഒരു ഹിന്ദു മത നേതാവിനെ അപമാനിച്ചുവെന്നും ഇത് സംഘർഷത്തിലേക്ക് നയിക്കുന്നരീതിയിലായിരുന്നുവെന്നും പരാതിയിൽ ആരോപിക്കുന്നു.

ധർമ്മസ്ഥലയിൽ മുഖ്യമന്ത്രി സിദ്ധരാമയ്യ 28 കൊലപാതകങ്ങൾ നടത്തിയതായി ആക്ടിവിസ്റ്റ് മഹേഷ് ഷെട്ടി തിമറോഡി ആരോപിച്ചതിനെത്തുടർന്ന് തിങ്കളാഴ്ച നിയമസഭ ചൂടേറിയ ചർച്ചകൾക്ക് സാക്ഷ്യം വഹിച്ചു. തിമറോഡിക്കെതിരെ സ്വമേധയാ കേസെടുത്ത് വേഗത്തിൽ അറസ്റ്റ് ചെയ്യാൻ ആഭ്യന്തരമന്ത്രി ജി പരമേശ്വര പൊലീസിനോട് നിർദേശിച്ചിരുന്നു.