Local Body Election 2025 | തദ്ദേശ തിരഞ്ഞെടുപ്പ്; ഹരിത ചട്ടം പാലിച്ചില്ലെങ്കിൽ പിടിവീഴും | State Election Commission releases Green Protocol guidelines for local body elections | Kerala
Last Updated:
പ്രചാരണം മുതല് പോളിംഗ് ബൂത്ത് വരെയും പ്ലാസ്റ്റിക് ഒഴിവാക്കി പരിസ്ഥിതി സൗഹൃദ വസ്തുക്കള് ഉപയോഗിക്കാനാണ് കമ്മീഷന്റെ നിർദേശം
പത്തനംതിട്ട: തദ്ദേശ സ്വയംഭരണ തിരഞ്ഞെടുപ്പ് പരിസ്ഥിതി സൗഹൃദമാക്കുന്നതിനായി സംസ്ഥാന തിരഞ്ഞെടുപ്പ് കമ്മീഷന് ഹരിത മാര്ഗനിര്ദേശം പുറത്തിറക്കി. സംസ്ഥാന തിരഞ്ഞെടുപ്പ് കമ്മീഷന്റെ നിർദ്ദേശപ്രകാരം പ്രചാരണം മുതൽ വോട്ടെടുപ്പിന് ശേഷമുള്ള ശുചീകരണം വരെയുള്ള എല്ലാ ഘട്ടങ്ങളിലും ഗ്രീൻ പ്രോട്ടോക്കോൾ കർശനമായി പാലിക്കണം. പ്രചാരണം മുതല് പോളിംഗ് ബൂത്ത് വരെയും പ്ലാസ്റ്റിക് ഒഴിവാക്കി പരിസ്ഥിതി സൗഹൃദ വസ്തുക്കള് ഉപയോഗിക്കാനാണ് കമ്മീഷന്റെ നിർദേശം.
ഹരിത ചട്ടത്തിലെ പ്രധാന മാർഗ്ഗനിർദ്ദേശങ്ങൾ:
- നിരോധിത വസ്തുക്കൾ: പ്രചാരണത്തിന് ഉപയോഗിക്കുന്ന ബോർഡ്, ബാനർ, ഹോർഡിംഗ്, പോസ്റ്റർ എന്നിവയ്ക്ക് പി.വി.സി, ഫ്ളക്സ്, പോളിസ്റ്റർ, നൈലോൺ, കൊറിയൻ ക്ലോത്ത് തുടങ്ങിയ പ്ലാസ്റ്റിക് അടങ്ങിയ വസ്തുക്കൾ ഉപയോഗിക്കാൻ പാടില്ല.
- അനുവദനീയമായവ: മലിനീകരണ നിയന്ത്രണ ബോർഡ് സർട്ടിഫൈ ചെയ്ത പേപ്പർ, നൂറ് ശതമാനം കോട്ടൺ, ലിനൻ പോലെ പുനഃരുപയോഗിക്കാവുന്ന വസ്തുക്കൾ മാത്രമേ ഉപയോഗിക്കാവൂ.
- ഭക്ഷണം: പോളിംഗ് ഉദ്യോഗസ്ഥർക്കും ഏജന്റുമാർക്കും ഉള്ള ഭക്ഷണം പ്ലാസ്റ്റിക് പാഴ്സലുകൾ ഒഴിവാക്കി, കുടുംബശ്രീ കാറ്ററിംഗ് യൂണിറ്റുകൾ മുഖേന വാഴയിലയിലോ, പുനരുപയോഗിക്കാവുന്ന പാത്രങ്ങളിലോ മാത്രം ലഭ്യമാക്കണം.
- കർശന നിയമനടപടി: ഹരിതചട്ട നിബന്ധനകൾ പാലിക്കാത്ത സ്ഥാനാർത്ഥികൾക്കും നിരോധിത വസ്തുക്കൾ ഉപയോഗിക്കുന്ന സംഘടനകൾക്കുമെതിരെ കർശന നിയമനടപടി സ്വീകരിക്കാൻ തദ്ദേശ സ്ഥാപന സെക്രട്ടറിമാർക്ക് നിർദ്ദേശം നൽകിയിട്ടുണ്ട്.
- എൻഫോഴ്സ്മെന്റ്: ഹരിതചട്ട ലംഘനം കണ്ടെത്താൻ തദ്ദേശ സ്ഥാപന തലത്തിൽ പ്രത്യേക എൻഫോഴ്സ്മെന്റ് സ്ക്വാഡിന് രൂപം നൽകും.
- പൊതുജന പങ്കാളിത്തം: പൊതുജനങ്ങൾക്ക് ഹരിത ചട്ട ലംഘനങ്ങൾ റിപ്പോർട്ട് ചെയ്യുന്നതിന് ‘സിംഗിൾ വാട്സപ്പ് നമ്പർ’ സംവിധാനം ഏർപ്പെടുത്തും.
- മാലിന്യം നീക്കം ചെയ്യൽ: വോട്ടെടുപ്പ് അവസാനിച്ചാൽ ഉടൻ സ്ഥാനാർത്ഥികളും രാഷ്ട്രീയ കക്ഷികളും പ്രചാരണ സാമഗ്രികൾ ശേഖരിച്ച് ഹരിത കർമ്മ സേനയ്ക്ക് യൂസർഫീ സഹിതം കൈമാറണം.
- ചെലവ് ഈടാക്കൽ: പ്രചാരണ സാമഗ്രികൾ നീക്കം ചെയ്യുന്നില്ലെങ്കിൽ, വോട്ടെടുപ്പ് കഴിഞ്ഞ് അഞ്ച് ദിവസത്തിനുള്ളിൽ തദ്ദേശ സ്വയംഭരണ സ്ഥാപന സെക്രട്ടറിമാർ നീക്കം ചെയ്യും. ഇതിന്റെ ചെലവ് സ്ഥാനാർത്ഥിയുടെ വ്യക്തിപരമായ ബാധ്യതയായി കണക്കാക്കി നിയമനടപടികളിലൂടെ ഈടാക്കും.
- ഹരിത കർമ്മസേനയ്ക്ക് വേതനം: പോളിംഗ് ബൂത്തുകൾ, കൗണ്ടിംഗ് സ്റ്റേഷനുകൾ, പരിശീലന കേന്ദ്രങ്ങൾ എന്നിവിടങ്ങളിൽ മാലിന്യ പരിപാലനത്തിനായി ഹരിത കർമ്മസേനയുടെ സേവനം ഉറപ്പാക്കണമെന്നും, നിയോഗിക്കപ്പെടുന്ന ഒരംഗത്തിന് പ്രതിദിനം 710/- രൂപ വേതനം നൽകണമെന്നും സർക്കുലറിൽ നിർദ്ദേശിക്കുന്നു.
ഏറ്റവും പുതിയ വാർത്തകൾ, വിഡിയോകൾ, വിദഗ്ദാഭിപ്രായങ്ങൾ, രാഷ്ട്രീയം, ക്രൈം, തുടങ്ങി എല്ലാം ഇവിടെയുണ്ട്. ഏറ്റവും പുതിയ കേരളവാർത്തകൾക്കായി News18 മലയാളത്തിനൊപ്പം വരൂ
Location :
Thiruvananthapuram,Kerala
First Published :
November 15, 2025 3:00 PM IST