84% സീറ്റിലും മുസ്ലിം വിദ്യാർത്ഥികൾ; ജമ്മു കശ്മീരിലെ വൈഷ്‌ണോ ദേവി മെഡിക്കൽ കോളജിൽ പ്രതിഷേധവുമായി ബിജെപി | BJP protest against Muslim majority students in Vaishno Devi Medical Institute | India

ജമ്മു കശ്മീർ നിയമസഭയിലെ പ്രതിപക്ഷ നേതാവ് സുനിൽ ശർമയുടെ നേതൃത്വത്തിലുള്ള ഒരു പ്രതിനിധി സംഘം ശനിയാഴ്ച ലെഫ്റ്റനന്റ് ഗവർണർ മനോജ് സിൻഹയെ കണ്ട് പ്രവേശന മാനദണ്ഡങ്ങൾ പുനഃപരിശോധിക്കണമെന്നും തിരുത്തൽ നടപടികൾ സ്വീകരിക്കണമെന്നും ആവശ്യപ്പെടുന്ന നിവേദനം സമർപ്പിച്ചു.

വൈഷ്‌ണോ ദേവി ക്ഷേത്രത്തിലെത്തുന്ന തീർത്ഥാടകരുടെ വഴിപാടുകളും നേർച്ചയും ഉപയോഗിച്ച് സ്ഥാപിച്ച സ്ഥാപനങ്ങൾ ക്ഷേത്രത്തിന്റെ ധാർമികതയെ പ്രതിഫലിപ്പിക്കണമെന്ന് സമൂഹ മാധ്യമമായ എക്സിൽ പങ്കുവെച്ച പോസ്റ്റിൽ അദ്ദേഹം ആവശ്യപ്പെട്ടു. അതിനനുസരിച്ച് ക്ഷേത്ര ബോർഡ് നിയമത്തിലും സർവകലാശാല നിയമത്തിലും ഭേദഗതികൾ വരുത്തണമെന്നും അദ്ദേഹം ആവശ്യപ്പെട്ടു.

യുവ രജപുത്ര സഭ, രാഷ്ട്രീയ ബജ്രംഗ് ദൾ, മൂവ്‌മെന്റ് കൽക്കി എന്നീ സംഘടനകളിലെ അംഗങ്ങൾ യൂണിവേഴ്‌സിറ്റി കാംപസിലേക്ക് മാർച്ച് നടത്തിയിരുന്നു. ഇതിന് പിന്നാലെയാണ് പ്രതിഷേധം ശക്തമായത്. പോലീസിനെ മറികടന്ന് ഇവർ ഗേറ്റ് ബലമായി തുറന്നു. തുടർന്ന് പോലീസ് ഇവരെ തടഞ്ഞു. കോളേജിൽ ഏഴ് ഹിന്ദു വിദ്യാർഥികളും ഒരു സിഖ് വിദ്യാർഥിയും മാത്രമേ പ്രവേശനം നേടിയിട്ടുള്ളൂവെന്ന് പ്രതിഷേധക്കാർ അവകാശപ്പെട്ടു.  ഈ പട്ടിക അസ്വീകാര്യമാണെന്ന് പറഞ്ഞ അവർ പുതിയ പട്ടിക പ്രസിദ്ധീകരിക്കണമെന്ന് ആവശ്യപ്പെടുകയും ചെയ്തു.

കോളേജിൽ ഈ വർഷം 50 എംബിബിഎസ് സീറ്റുകളാണ് അനുവദിച്ചത്. ശ്രീ മാതാ വൈഷ്‌ണോ ദേവി ക്ഷേത്ര ബോർഡാണ് കോളേജിന് പൂർണമായും ധനസഹായം നൽകുന്നത്. ഹിന്ദുക്കളായ ഭക്തർ  നൽകുന്ന സംഭാവനകൾ ഉപയോഗിച്ച് പ്രവർത്തിക്കുന്ന ഒരു സ്ഥാപനം ഹിന്ദുസമൂഹത്തിന് മുൻഗണന നൽകണമെന്ന് പ്രതിഷേധക്കാർ വാദിച്ചു. ക്ഷേത്ര ബോർഡിന്റെ അധ്യക്ഷനായ ലെഫ്റ്റനന്റ് ഗവർണർ സിൻഹ വിഷയത്തിൽ ഇടപെട്ടില്ലെങ്കിൽ പ്രക്ഷോഭം ശക്തമാക്കുമെന്നും പ്രതിഷേധക്കാർ മുന്നറിയിപ്പ് നൽകി.

പ്രവേശനത്തെ രാഷ്ട്രീയവത്കരിക്കുന്നത് പതിറ്റാണ്ടുകൾ നീണ്ട ശാസ്ത്രീയ പുരോഗതിയെ ദുർബലപ്പെടുത്തുമെന്ന് ലോൺ മുന്നറിയിപ്പ് നൽകി. മതഭ്രാന്തന്മാരെയല്ല, ഗവേഷകരെയാണ് വൈദ്യശാസ്ത്രത്തിന് ആവശ്യമെന്നും അദ്ദേഹം പറഞ്ഞു. ഇന്ത്യ നവീകരണത്തിലും ആഗോളസഹകരണത്തിലും ഗവേഷണസംസ്‌കാരം ശക്തിപ്പെടുത്തുന്നതിലും ശ്രദ്ധ കേന്ദ്രീകരിക്കണമെന്നും അദ്ദേഹം ആവശ്യപ്പെട്ടു.