1000 Crime stories: ഓഫീസ് ബന്ധത്തിലെ കാമാസക്തി തകർത്തത് ഒരു കുടുംബത്തെ; ആറ്റിങ്ങലിലെ ഇരട്ടക്കൊലപാതകത്തിൻ്റെ കഥ| attingal twin murder story of anushanthi and nino mathew

തിരുവനന്തപുരം ടെക്നോപാര്‍ക്കിലെ ഒരു സോഫ്റ്റ്‌വെയർ കമ്പനിയില്‍ ആറു വര്‍ഷത്തോളമായി ഇരുവരും ജോലി ചെയ്തു വരികയായിരുന്നു ടീം ലീഡറായിരുന്ന അനുശാന്തിയും പ്രൊജക്ട് മാനേജറായ നിനോ മാത്യുവും. അടുത്തടുത്ത ക്യാബിനുകളിലാണ് രണ്ടുപേരുടെയും ഇരിപ്പിടം. അടുപ്പം പതിയെ പ്രണയമായി വളര്‍ന്നു. നേരത്തെ ഓഫീസിലെത്തി താമസിച്ചാണ് പലപ്പോഴും ഇവർ മടങ്ങി പോയിരുന്നത്. അനുശാന്തിയെ ദിവസവും ബസ് സ്റ്റോപ്പില്‍നിന്ന് തന്റെ കാറിലാണ് നിനോ ഓഫീസിലേക്ക് കൂട്ടിക്കൊണ്ടുപോയിരുന്നതും തിരിച്ചു കൊണ്ടുവിടുന്നതും. നിനോ പല ദിവസങ്ങളിലും രാത്രിയില്‍ ആലംകോട്ടെ വീട്ടിലെത്തി അനുശാന്തിയെ കാണാറുമുണ്ടായിരുന്നു.

നിനോയുമായുള്ള അനുശാന്തിയുടെ ബന്ധം ഭർത്താവ് ലിജീഷ് അറിഞ്ഞപ്പോളാണ് പ്രശ്നങ്ങൾ തുടങ്ങിയത്. അനുശാന്തി ഫോണില്‍ നിനോയോട് സംസാരിക്കുന്നത് ശ്രദ്ധിച്ച ലിജീഷ് ബന്ധത്തെ ചോദ്യം ചെയ്തു. നിനോ അനുശാന്തിയ്ക്കയച്ച ചില സന്ദേശങ്ങളും ഭർത്താവ് കണ്ടു. I need u, i want u in my life എന്നിങ്ങനെയായിരുന്നു സന്ദേശങ്ങള്‍.. ‌തനിക്കൊപ്പം ജീവിക്കാന്‍ ഇഷ്ടമല്ലെങ്കില്‍ പൊയ്ക്കോളാന്‍ ലിജീഷ് പറഞ്ഞു. എന്നാൽ തനിക്ക് കുടുംബമാണ് വലുതെന്നും നിനോയുമായുള്ള ബന്ധം തുടരില്ലെന്നുമായിരുന്നു അനുശാന്തിയുടെ മറുപടി. അങ്ങനെയെങ്കില്‍ ജോലി രാജിവയ്ക്കാന്‍ ലിജീഷ് ആവശ്യപ്പെട്ടു. ഈ വിവരം അനുശാന്തി നിനോയെ അറിയിച്ചു. ഒപ്പം ഇറങ്ങിവരണമെന്ന് നിനോ ആവശ്യപ്പെട്ടപ്പോൾ ഭര്‍ത്താവും കുഞ്ഞുമുള്ളപ്പോള്‍ പറ്റില്ലെന്നായിരുന്നു അനുശാന്തിയുടെ മറുപടി. ഇതോടെയാണ് ഒന്നിച്ചു ജീവിക്കാന്‍ ലിജീഷിനെയും മകളെയും ലിജീഷിന്റെ അമ്മയേയും ഇല്ലാതാക്കാന്‍ ഇരുവരും പദ്ധതിയിടുന്നത്.

2014 ഏപ്രില്‍ 16 ബുധനാഴ്ച ഉച്ചയ്ക്ക് 12.30-ഓടെ നിനോ ലിജീഷിന്റെ വീട്ടിലെത്തി. ബസിലാണ് എത്തുന്നത്. രാവിലെ നിനോയും അനുശാന്തിയും ഓഫീസില്‍ എത്തിയിരുന്നു. 10.54-ഓടെ ചിട്ടി പിടിക്കാനെന്ന് പറഞ്ഞാണ് നിനോ ഓഫീസില്‍ നിന്നുമിറങ്ങുന്നത്. ഫോണ്‍ സ്വിച്ച് ഓഫ് ചെയ്ത ശേഷം കാര്‍ കഴക്കൂട്ടത്ത് ഒതുക്കിയിട്ടു. രണ്ടു ദിവസം മുമ്പ് തന്നെ വാങ്ങിയ ബേസ് ബോള്‍ ബാറ്റ് ബാഗിനുള്ളില്‍ കൊള്ളുന്ന വിധം മുറിച്ചു ചെറുതാക്കി. മുളകുപൊടി, വെട്ടുകത്തി, കത്തി, ബ്ലേഡ്, ബിയര്‍ കുപ്പി, ഒരു ഷര്‍ട്ട് എന്നിവയും ബാഗില്‍ കരുതി.

ലിജീഷിന്റെ അമ്മയും സ്വസ്തികയും മാത്രമേ വീട്ടിലുണ്ടായിരുന്നുള്ളൂ. ലിജീഷിന്റെ ഒപ്പം ജോലിചെയ്യുന്ന ആളാണെന്നും വിവാഹം ക്ഷണിക്കാന്‍ വന്നതാണെന്നും അമ്മയോട് പറഞ്ഞു. നിനോയോട് വീടിനുള്ളില്‍ കയറിയിരിക്കാന്‍ പറഞ്ഞ ശേഷം ഓമന, സ്വസ്തികയേയും കൂട്ടി അടുക്കളയിലേക്ക് പോയി. ഈ സമയം ബേസ് ബോള്‍ ബാറ്റെടുത്ത് നിനോ കുഞ്ഞിന്റെ തലയ്ക്കടിച്ചു. തടയാന്‍ ചെന്ന ഓമനയ്ക്കും അടിയേറ്റു. നിലവിളിക്കാന്‍ തുടങ്ങിയപ്പോഴേക്കും വെട്ടുകത്തിയെടുത്ത് ഇരുവരേയും വെട്ടി. കുഞ്ഞിന്റെ കഴുത്തിലും നെഞ്ചിലുമായി നാല് വെട്ടുവെട്ടി. ഓമനയുടെ കഴുത്ത് അറ്റുപോയി. മോഷണശ്രമത്തിനിടെയുള്ള കൊലപാതകമാണെന്ന് തെറ്റിദ്ധരിപ്പിക്കാന്‍ ഇരുവരുടെയും ദേഹത്തു നിന്ന് നിനോ ആഭരണങ്ങളും ഊരിമാറ്റി. മരിച്ചു കഴിഞ്ഞിട്ടും ജീവന്റെ കണിക പോലുമില്ലെന്ന് ഉറപ്പാക്കാന്‍ ഇരുവരെയും വീണ്ടും വീണ്ടും വെട്ടി.

ലിജീഷിന്റെ വീട്ടില്‍ നിന്ന് രണ്ടു മിനിറ്റ് കൊണ്ടു നടന്ന് ദേശീയ പാതയിലെത്താമായിരുന്നെങ്കിലും നിനോ മാത്യു മറ്റൊരു വഴിയിലൂടെയെത്തിയാണ് ആലംകോട് ജംഗ്ഷനിൽ നിന്ന് ബസില്‍ കയറിയത്. ഈ വഴികള്‍ മുഴുവന്‍ അനുശാന്തി നിനോ മാത്യുവിന് വരച്ചുകൊടുക്കുകയും മൊബൈലില്‍ ചിത്രീകരിച്ച് കൈമാറുകയും ചെയ്തിരുന്നു. കൃത്യം നടന്നുവെന്ന വിവരമറിഞ്ഞ് അനുശാന്തി ഓഫീസില്‍ നിന്ന് നേരെ സ്വന്തം വീട്ടിലേക്ക് പോയി. കൊലപാതകം നടത്തി ഒന്നുമറിയാത്തതുപോലെ ഓഫീസിലെത്താനായിരുന്നു നിനോ മാത്യുവിന്റെ പദ്ധതി. ലിജീഷ് രക്ഷപ്പെട്ടതുകൊണ്ടും നിനോ മാത്യുവിനെ തിരിച്ചറിഞ്ഞതുകൊണ്ടും പദ്ധതി പൊളിഞ്ഞതോടെ ഇയാള്‍ താമസസ്ഥലത്തേക്കാണ് മടങ്ങിയത്. അവിടെ നിന്നും പൊലീസ് പ്രതിയെ പിടികൂടി. നിനോയുടെ മൊഴിയുടെ അടിസ്ഥാനത്തില്‍ അനുശാന്തിയും പിടിയിലായി.

വിവാഹിതനും ഒരു കുട്ടിയുടെ അച്ഛനുമായിരുന്നു നിനോ മാത്യു. ഇയാളുടേത് പ്രണയവിവാഹവുമായിരുന്നു. അനുശാന്തിയുമായി ബന്ധമായതോടെ ഭാര്യയുമായി പിണക്കത്തിലായി. അനുശാന്തിയെ കൊണ്ടുവിടുന്നതിനും തിരിച്ചാക്കുന്നതിനും ടെക്‌നോപാര്‍ക്കില്‍ മറ്റൊരു കമ്പനിയില്‍ ജോലി ചെയ്തിരുന്ന ഇയാളുടെ ഭാര്യ സാക്ഷിയായിരുന്നു. നിനോ മാത്യുവിന് അനുശാന്തിയോടുള്ള അടുപ്പം അതിരുവിടുന്നുവെന്ന് മനസ്സിലാക്കി ഇയാളുടെ പിതാവ് ഉപദേശരൂപത്തിലെഴുതിയ കത്ത് അന്ന് പൊലീസ് കണ്ടെടുത്തതാണ്.