രക്ഷാബന്ധന്‍ ദിനത്തില്‍ സഹോദരന്‍ സഹോദരിയുടെ തല മുണ്ഡനം ചെയ്ത് കൊന്നു; തലേദിവസം കാമുകനെയും|Brother kills sister tonsuring her head on Raksha Bandhan Day After Killing Her Lover | Crime

അന്ന് വൈകുന്നേരം വിശാല്‍ പിതാവിനെ ഫോണില്‍ ബന്ധപ്പെടുകയും താന്‍ തഹ്‌റുവാലിയിലാണെന്നും രാത്രി വീട്ടിലെത്താന്‍ സാധ്യതയില്ലെന്നും പറഞ്ഞു. വിശാലിന്റെ കുടുംബം അയാളുമായി അവസാനം ബന്ധപ്പെട്ടത് ഇതായിരുന്നു. ഓഗസ്റ്റ് എട്ടിന് നദിക്കടുത്തുള്ള കുറ്റിക്കാട്ടില്‍ നിന്ന് ലാച്ചുര പോലീസ് ഒരു അജ്ഞാത യുവാവിന്റെ മൃതദേഹം കണ്ടെടുത്തു. മൃതദേഹത്തിന്റെ കഴുത്തില്‍ മുറിവേറ്റ പാടുകള്‍ ഉണ്ടായിരുന്നു. കഴുത്തുഞെരിച്ച് കൊലപ്പെടുത്തിയതാണെന്ന് ഇത് സൂചിപ്പിക്കുന്നു. ഈ മൃതദേഹത്തിന്റെ ചിത്രം പിന്നീട് സോഷ്യല്‍ മീഡിയയിലൂടെ പ്രചരിച്ചു. തുടര്‍ന്ന് ഇത് വിശാലിന്റെ ബന്ധുക്കളുടെ കൈവശവുമെത്തി. ഓഗസ്റ്റ് 9ന് രാത്രിയാണ് വിശാലാണ് മരിച്ചതെന്ന് സ്ഥിരീകരിച്ചത്.

പിറ്റേന്ന് രാവിലെ ചന്ദ്രപുര ഗ്രാമമുണര്‍ന്നത് ഒരു യുവതിയുടെ മൃതദേഹം കണ്ടെത്തിയെന്ന വാര്‍ത്തയോടെയാണ്. തല മുണ്ഡനം ചെയ്ത നിലയില്‍ അടുത്തുള്ള ഒരു കുന്നിന്‌റെ മുകളിലാണ് മൃതദേഹം കണ്ടെത്തിയത്. അരവിന്ദിന്റെ ഇളയസഹോദരിയായ പുച്ഛു അഹിര്‍വാര്‍ (പുട്ടോയെന്നും അറിയപ്പെടുന്നു) ആണ് മരിച്ചതെന്ന് തിരിച്ചറിഞ്ഞു.

പോലീസ് നടത്തിയ അന്വേഷണത്തില്‍ വിശാലും പുച്ഛുവും ഒരു വര്‍ഷത്തിലേറെയായി പ്രണയത്തിലായിരുന്നുവെന്ന് കണ്ടെത്തി. നുനാര്‍ ഗ്രാമത്തിലെ ഒരു ബന്ധുവിന്റെ വീട്ടില്‍വെച്ചാണ് ഇരുവരും പരസ്പരം കണ്ടുമുട്ടിയത്. ഇവരുടെ സൗഹൃദം വൈകാതെ പ്രണയമായി മാറി. എന്നാല്‍ ഇരുവരുടെയും ജാതിയും സമുദായവും വെവ്വേറെയായിരുന്നു. അതിനാല്‍ കുടുംബാംഗങ്ങളില്‍ നിന്ന് കടുത്ത എതിര്‍പ്പ് ഇവര്‍ക്ക് നേരിടേണ്ടി വന്നിരുന്നതായി പറയപ്പെടുന്നു.

ഈ വര്‍ഷം ജനുവരിയില്‍ വിശാലും പുച്ഛുവും ഒളിച്ചോടിയിരുന്നു. കുടുംബാംഗങ്ങള്‍ പോലീസില്‍ പരാതി നല്‍കിയതിനെ തുടര്‍ന്ന് പോലീസ് അവരെ മൂന്ന് ദിവസത്തിനുള്ളില്‍ കണ്ടെത്തി തിരികെ വീട്ടില്‍ കൊണ്ടുവന്നു. പോലീസ് സ്‌റ്റേഷനില്‍വെച്ച് ഇരുവരും ഒത്തുതീര്‍പ്പിലെത്തുകയും പ്രണയം അവസാനിപ്പിക്കുന്നതായി അറിയിക്കുകയും ചെയ്തു. തുടര്‍ന്ന് വിശാലിന്റെ കുടുംബം ഹരിയാനയിലേക്ക് താമസം മാറി.

എന്നിരുന്നാലും ഇരുവരും ഫോണിലൂടെ ആശയവിനിമയം തുടര്‍ന്നു. മാതാപിതാക്കള്‍ എതിര്‍ത്തെങ്കിലും അത് വകവയ്ക്കാതെ പ്രണയം തുടര്‍ന്നു. കൊലപാതകം നടക്കുന്നതിന് മുമ്പ് രക്ഷാബന്ധന്‍ ആഘോഷിക്കുന്നതിനായി വിശാലിന്റെ കുടുംബം പഴയഗ്രാമത്തിലേക്ക് മടങ്ങി. ഇത് വീണ്ടും സംഘര്‍ഷമുണ്ടാകാന്‍ കാരണമായെന്നാണ് കരുതുന്നത്.

”എന്റെ മകള്‍ കാമുകനോടൊപ്പം പോകാന്‍ വീണ്ടും പദ്ധതിയിട്ടിരുന്നു. തുടര്‍ന്ന് അരവിന്ദ് ഇതില്‍ അവളോട് ദേഷ്യപ്പെട്ടു. മകളുടെ തല മുണ്ഡനം ചെയ്ത് ശ്വാസം മുട്ടിച്ച് കൊലപ്പെടുത്തിയ ശേഷം മൃതദേഹം കുന്നിന്റെ മുകളില്‍ തള്ളുകയായിരുന്നു,” പപ്പു പറഞ്ഞു.

”പോസ്റ്റ്‌മോര്‍ട്ടത്തില്‍ മരണത്തിന്റെ യഥാര്‍ത്ഥ കാരണം കണ്ടെത്താന്‍ കഴിയും. പ്രണയത്തോടുള്ള എതിര്‍പ്പ് കണക്കിലെടുത്ത് ദുരഭിമാന കൊലയുള്‍പ്പെടെയുള്ള കാര്യങ്ങളില്‍ അന്വേഷണം നടത്തുന്നുണ്ട്,” അദ്ദേഹം പറഞ്ഞു.