‘ജീവിതാന്ത്യം അന്തസ്സോടെ’ ഈ വർഷത്തെ പിന്റോ പ്രഭാഷണ പരമ്പരയിലെ വിഷയം | Padma Sri Dr. M R Rajagopal to deliver this year’s edition of dr. Pinto Public Lecture Series

ഇന്ത്യയിൽ പാലിയേറ്റീവ് കെയർ രംഗത്തിന് തുടക്കം കുറിച്ച് ആഗോളതലത്തിൽ ശ്രദ്ധിക്കപ്പെട്ട വ്യക്തിയായ ഡോ. എം. ആർ. രാജഗോപാലിനെ ‘ഇന്ത്യയിലെ പാലിയേറ്റീവ് കെയറിന്‍റെ പിതാവ്’ എന്നാണ് ന്യൂയോര്‍ക്ക് ടൈംസ് വിശേഷിപ്പിച്ചിട്ടുള്ളത്. 1993ൽ കോഴിക്കോട് മെഡിക്കൽ കോളജിൽ ജോലി ചെയ്യവേ ആരംഭിച്ച പെയിൻ ആൻഡ് പാലിയേറ്റീവ് കെയർ സൊസൈറ്റി ആണ് കേരളത്തിലും ഇന്ത്യയിലും സാന്ത്വന പരിചരണത്തിന് തുടക്കമിട്ടത്. ലോകാരോഗ്യ സംഘടന അംഗീകരിക്കുന്ന നിലയിലുള്ള ഒരു മാതൃകയായി ഇത് മാറുകയും പാലിയേറ്റീവ് കെയർ സേവനങ്ങളുടെ സംസ്ഥാനവ്യാപക ശൃംഖല കേരളത്തിൽ കെട്ടിപ്പടുക്കുന്ന നിലയിൽ അത് വികസിക്കുകയും ചെയ്തു. 2004ൽ അദ്ദേഹം തിരുവനന്തപുരം കേന്ദ്രീകരിച്ച് തുടക്കമിട്ട പാലിയം ഇന്ത്യ എന്ന സ്ഥാപനം ഇന്ന് ഇന്ത്യയിലുടനീളം ഈ രംഗത്ത് ലാഭേച്ഛയില്ലാതെ സേവനം നൽകിവരുന്നു. ഒപ്പം സാന്ത്വന പരിചരണരംഗത്ത് പരിശീലനം നൽകുന്നതിനായി ട്രിവാൻഡ്രം ഇൻസ്റ്റിറ്റ്യൂട്ട് ഓഫ് പാലിയേറ്റീവ് സയൻസസിനും അദ്ദേഹം തുടക്കമിട്ടു.

എഴുത്തുകാരനും, ആരോഗ്യപ്രവർത്തകനുമായിരുന്ന ഡോ. സി. പിന്റോ അപൂർവമായ അമിയോട്രോഫിക് ലാറ്ററൽ സ്ക്ലിറോസിസ് (ALS) എന്ന രോഗത്തെത്തുടർന്ന് 2005 ൽ തന്റെ 35 ആം വയസിലാണ് അന്തരിച്ചത്. ഗൗരവമേറിയ ചർച്ചകൾക്ക് അന്തരീക്ഷം സൃഷ്ടിക്കുന്ന ഏറ്റവും മികച്ച വേദികളിൽ ഒന്നായിത്തീരുവാൻ പിന്റോ പ്രഭാഷണങ്ങൾക്ക് കഴിഞ്ഞിട്ടുണ്ട്.