ഷാർജയിൽ‌ മരിച്ച വിപഞ്ചികയുടെ മൃതദേഹം നാട്ടിലെത്തിച്ചു; റീ പോസ്റ്റ്‌മോര്‍ട്ടത്തിന് ശേഷം കൊല്ലത്തെ വീട്ടിലെത്തിക്കും; സംസ്കാരം വൈകിട്ട് മൂന്നിന്| Body of Vipanchika who died in Sharjah brought back to her home in Kollam after re-postmortem

രണ്ടാഴ്ച മുമ്പാണ് വിപഞ്ചിക​ ഷാർജയിൽ ജീവനൊടുക്കിയത് ചെയ്തത്. മൃതദേഹം ചൊവ്വാഴ്ച വൈകിട്ട്​ യുഎഇ സമയം 5.45നുള്ള എയർ ഇന്ത്യ എക്സ്​പ്രസ്​ വിമാനത്തിലാണ് നാട്ടിലേക്ക് എത്തിച്ചത്. പോസ്റ്റ്​മോർട്ടം ഉൾപ്പെടെ എല്ലാ നടപടികളും പൂർത്തിയായിരുന്നു​. ഷാർജയിലെ ഫോറൻസിക് ലാബിൽ ചൊവ്വാഴ്ച രാവിലെ 10 മണിയോടെയാണ്​​ എംബാമിങ്​ നടപടികൾ പൂർത്തീകരിച്ചത്​.

വിപഞ്ചികയുടെ മകൾ വൈഭവിയുടെ മൃതദേഹം നേരത്തെ ദുബൈയിലെ ജബൽ അലി ശ്മശാനത്തിൽ ഹിന്ദു മതാചാരപ്രകാരം സംസ്കരിച്ചിരുന്നു. ഈ മാസം എട്ടിനാണ്​ വിപഞ്ചിക​യും മകളും ഫ്ലാറ്റിൽ മരിച്ച നിലയിൽ കാണപ്പെട്ടത്​. മകളെ കൊലപ്പെടുത്തിയ ശേഷം വിപഞ്ചിക ജീവനൊടുക്കുകയായിരുന്നു. ഭർതൃ പീഡനമാണ്​ മരണ കാരണമെന്നാണ്​ ബന്ധുക്കളുടെ ആരോപണം.

വിപഞ്ചിക ഫേസ്ബുക്കില്‍ പോസ്റ്റ് ചെയ്ത കുറിപ്പ് വഴിയാണ് ഭർത്താവ് നിതീഷ്, സഹോദരി നീതു, പിതാവ് മോഹനൻ എന്നിവരിൽ നിന്ന് കൊടിയ പീഡനം നേരിടുകയാണെന്ന വിവരം പുറത്തറിഞ്ഞത്. നിതീഷ് വിവാഹ മോചനത്തിനു ശ്രമിക്കുന്നുണ്ടെന്നും അതു നടന്നാൽ ജീവിച്ചിരിക്കില്ലെന്നും വിപഞ്ചിക അമ്മയോടു പറഞ്ഞിരുന്നു.

ഇതിനിടെയാണ് വിവാഹ മോചനം വേണമെന്നാവശ്യപ്പെട്ട് നിതീഷ് വക്കീൽ നോട്ടിസ് അയച്ചത്. ഇതായിരിക്കാം ജീവനൊടുക്കാൻ‌ കാരണം എന്നാണ് കുടുംബം കരുതിയത്. ഇതിനിടെയാണ് കുറിപ്പ് ലഭിച്ചത്. ഇതിലൂടെയാണ് പീഡനവിവരങ്ങളും നിതീഷിന്‍റെ സ്വഭാവ വൈകൃതങ്ങളുമെല്ലാം കുടുംബം അറിയുന്നത്.