അടിമാലി മണ്ണിടിച്ചിലിൽ ഗുരുതരമായി പരിക്കേറ്റ സന്ധ്യയുടെ ചികിത്സാ ചെലവുകള് മമ്മൂട്ടി ഏറ്റെടുത്തു| Mammootty Takes Over Treatment Costs of sandhya Adimali Landslide victim | Kerala
Last Updated:
ഗുരുതരമായി പരിക്കേറ്റതിനെ തുടർന്ന് സന്ധ്യയുടെ ഇടത് കാല്മുറിച്ചുമാറ്റിയിരുന്നു
കൊച്ചി: അടിമാലി കൂമ്പന്പാറയിലുണ്ടായ മണ്ണിടിച്ചിലില് ഗുരുതരമായി പരിക്കേറ്റ അടിമാലി നെടുമ്പിളിക്കുടി വീട്ടില് സന്ധ്യ ബിജു (41)വിന്റെ ചികിത്സാ ചെലവുകള് പൂര്ണമായി നടന് മമ്മൂട്ടി ഏറ്റെടുത്തു. ആലുവ രാജഗിരി ആശുപത്രിയിലെ തുടര് ചികിത്സ മമ്മൂട്ടിയുടെ കെയര് ആൻഡ് ഷെയര് ഇന്റര്നാഷണല് ഫൗണ്ടേഷന്റെ നേതൃത്വത്തില് നടക്കും. ഗുരുതരമായി പരിക്കേറ്റതിനെ തുടർന്ന് സന്ധ്യയുടെ ഇടത് കാല്മുറിച്ചുമാറ്റിയിരുന്നു.
അപകടത്തില് ഭര്ത്താവ് ബിജു മരിക്കുകയും ഇടതു കാല്മുറിച്ചുമാറ്റുകയും ചെയ്തതോടെ സന്ധ്യയുടെ ജീവിതം പ്രതിസന്ധിയിലായിരുന്നു. മകന് കാന്സര് മൂലം കഴിഞ്ഞവര്ഷം മരിച്ചിരുന്നു. നഴ്സിങ് വിദ്യാര്ത്ഥിനിയായ മകള് മാത്രമാണ് ഇനി ആശ്രയം. ബന്ധുക്കള് സഹായം തേടി മമ്മൂട്ടിയുടെ കെയര് ആൻഡ് ഷെയര് ഫൗണ്ടേഷനെ സമീപിക്കുകയായിരുന്നു. തുടര്ന്ന് മമ്മൂട്ടി നേരിട്ട് രാജഗിരി ആശുപത്രി അധികൃതരുമായി സംസാരിക്കുകയും ചികിത്സാച്ചെലവുകള് ഏറ്റെടുക്കാനുള്ള സന്നദ്ധത അറിയിക്കുകയുമായിരുന്നു.
ഞായാറാഴ്ച പുലര്ച്ചയായിരുന്നു സന്ധ്യയെ രാജഗിരി ആശുപത്രിയിലെത്തിച്ചത്. ഇരുകാലുകള്ക്കും ഗുരുതര പരിക്കേറ്റ അവസ്ഥയിലാണ് സന്ധ്യയെ ആലുവ രാജഗിരി ആശുപത്രിയില് എത്തിച്ചത്. മൂന്ന് മണിക്കൂറോളം മണ്ണിനടിയില് അകപ്പെട്ട സന്ധ്യയെ ആശുപത്രിയില് എത്തിക്കുമ്പോള് ഏകദേശം ഏഴ് മണിക്കൂര് പിന്നിട്ടിരുന്നു. ഇടതുകാലിലേക്കുള്ള രക്തയോട്ടം പൂർണമായും തടസപ്പെടുകയും അസ്ഥികള് പലയിടങ്ങളിലായി ഒടിഞ്ഞ് മസിലുകളും കോശങ്ങളും ചതഞ്ഞരഞ്ഞ നിലയിലുമായിരുന്നു. പിന്നീട് എട്ടുമണിക്കൂര് നീണ്ടുനിന്ന ശസ്ത്രക്രിയയില് ഇടത്തേക്കലിലേക്കുള്ള രക്തയോട്ടം പൂര്വസ്ഥിതിയിലാക്കുകയും ഒടിഞ്ഞ അസ്ഥികള് ഏകദേശം പൂർണരൂപത്തിലാക്കുകയും ചെയ്തിരുന്നു,
എന്നാല്, ചതഞ്ഞരഞ്ഞ മസിലുകളും കോശങ്ങളും പുറപ്പെടുവിക്കുന്ന വിഷാംശങ്ങള് കൂടിവരികയും അവ ആന്തരികാവയവങ്ങളുടെ പ്രവര്ത്തനത്തെ തടസപ്പെടുത്തുകയും ചെയ്യുന്ന അവസ്ഥയിലെത്തിയതോടെ സന്ധ്യയുടെ ജീവന്രക്ഷിക്കുന്നതിനായി ഇടത്തേക്കാല് മുട്ടിന് മുകളില് വച്ച് നീക്കംചെയ്യുകയായിരുന്നു. ഇടതുകാലിന്റെ പ്രവര്ത്തനം സുഗമമാക്കാന് പ്ലാസ്റ്റിക് സര്ജറി ഉള്പ്പെടെ തുടര് ചികിത്സ ആവശ്യമാണ്. വലതുകാലിലെ ചതഞ്ഞരഞ്ഞ മസിലുകള്ക്കും തുടര് ചികിത്സ വേണ്ടിവരും.
Summary: Actor Mammootty has fully undertaken the medical expenses of Sandhya Biju (41) from Nedumbilikkudy house, Adimali, who was seriously injured in the landslide at Koombanpara, Adimali. Her continued treatment at Rajagiri Hospital, Aluva, will be managed under the leadership of Mammootty’s Care and Share International Foundation. Sandhya’s left leg had to be amputated due to the severe injuries sustained in the incident.
Kochi [Cochin],Ernakulam,Kerala
October 29, 2025 3:11 PM IST