RailOne റെയിൽവേയുടെ എല്ലാ സേവനങ്ങളും ഇനി ഒറ്റ ക്ലിക്കിൽ; റെയിൽവൺ ആപ്പുമായി ഇന്ത്യൻ റെയിൽവെ | Indian Railway launched new app RailOne from booking IRCTC tickets to checking train status

ടിക്കറ്റ് ബുക്കിങ്, പിഎൻആർ, പ്ലാറ്റ്ഫോം ടിക്കറ്റുകൾ, ട്രെയിൻ ട്രാക്കിങ്ങ് എന്നിവയ്ക്ക് പുറമെ കോച്ചിന്റെ സ്ഥാനം കണ്ടെത്തൽ, യാത്രാ ഫീഡ്ബാക്ക്, ഭക്ഷണം എന്നീ യാത്രാ സേവനങ്ങളെല്ലാം പുതിയ റെയിൽവൺ ആപ്പിൽ ലഭിക്കും. സെന്റർ ഫോർ റെയിൽവേ ഇൻഫർമേഷൻ സിസ്റ്റംസിന്റെ (CRIS) 40-ാമത് സ്ഥാപക ദിനത്തിൽ ന്യൂഡൽഹിയിലെ ഇന്ത്യ ഹാബിറ്റാറ്റ് സെന്ററിൽ കേന്ദ്ര റെയിൽവേ മന്ത്രി അശ്വിനി വൈഷ്ണവാണ് ‘ റെയിൽവൺ’ എന്ന പുതിയ ആപ്പ് പുറത്തിറക്കിയത്.

ആൻഡ്രോയിഡ് പ്ലേ സ്റ്റോറിലും iOS ആപ്പ് സ്റ്റോറിലും ഡൗൺലോഡ് ചെയ്യാൻ ആപ്പ് ലഭ്യമാണ്. താഴെപ്പറയുന്നതടക്കം യാത്രാ സേവനങ്ങളെല്ലാം ഈ ആപ്ലിക്കേഷനില്‍ സംയോജിപ്പിക്കുന്നു:

● റിസർവ് ചെയ്യാത്ത ടിക്കറ്റുകളും പ്ലാറ്റ്‌ഫോം ടിക്കറ്റുകളും 3% കിഴിവോടെ

● ട്രെയിനിന്റെ തത്സമയ സഞ്ചാരസ്ഥിതി

● പരാതി പരിഹാരം

● ഓണ്‍ലൈന്‍ ഭക്ഷണവിതരണം, ചുമട്ടുതൊഴിലാളികളെ ബുക്ക് ചെയ്യല്‍, ടാക്സി സേവനം

റിസർവ് ചെയ്ത ടിക്കറ്റുകൾ ഐആർസിടിസി വഴി തുടർന്നും ലഭിക്കും. ഐആർസിടിസിയുമായി പങ്കാളിത്തത്തോടെ പ്രവര്‍ത്തിക്കുന്ന മറ്റ് നിരവധി വാണിജ്യ അപ്ലിക്കേഷനുകള്‍പോലെ റെയിൽവൺ ആപ്പിനെയും ഐആർസിടിസി അംഗീകരിച്ചിട്ടുണ്ട്

എം-പിൻ അല്ലെങ്കിൽ ബയോമെട്രിക് വിവരങ്ങളുപയോഗിച്ച് ലോഗിൻ ചെയ്ത് ഒറ്റത്തവണ സൈൻ-ഇന്‍ ചെയ്യാന്‍ റെയിൽവണിൽ സൗകര്യമുണ്ട്. നിലവില്‍ റെയിൽകണക്റ്റ്, യുടിഎസ് അപ്ലിക്കേഷനുകള്‍ക്ക് ഉപയോഗിച്ചിരിക്കുന്ന ലോഗിന്‍ വിവരങ്ങള്‍ ഇതിലും ഉപയോഗിക്കാം. ഒന്നിലധികം അപ്ലിക്കേഷനുകൾ ഇൻസ്റ്റാൾ ചെയ്യേണ്ടതില്ലാത്തതിനാല്‍ ഫോണ്‍ സ്റ്റോറേജ് ലാഭിക്കാം.

ഇന്ത്യൻ റെയിൽവേ യാത്രക്കാർ നിലവിൽ വിവിധ സേവനങ്ങൾക്കായി നിരവധി വ്യത്യസ്ത ആപ്പുകളും വെബ്സൈറ്റുകളുമാണ് ഉപയോഗിക്കുന്നത്. ടിക്കറ്റ് ബുക്കിങ്ങിനായി ഐആർസിടിസി റെയിൽ കണക്ട്, ഭക്ഷണം ഓർഡർ ചെയ്യുന്നതിനായി ഐആർസിടിസി ഇ-കാറ്ററിങ്ങ് ഫുഡ് ഓൺ ട്രാക്ക്, ഫീഡ്ബാക്ക് നൽകുന്നതിനായി റെയിൽ മദദ്, റിസർവ് ചെയ്യാത്ത ടിക്കറ്റുകൾക്കായി യുടിഎസ്, ട്രെയിൻ ട്രാക്ക് ചെയ്യുന്നതിനായി നാഷണൽ ട്രെയിൻ എൻക്വയറി സിസ്റ്റം എന്നിവയാണിവ.

പ്രധാനമന്ത്രി നരേന്ദ്ര മോദിയുടെ പദ്ധതിയാണ് പുതിയ ആപ്ലിക്കേഷൻ. സാങ്കേതികവിദ്യ ജനാധിപത്യവൽക്കരിക്കാനും ഓരോ യാത്രികനും ലോകോത്തര ഗതാഗത സൗകര്യം ഉറപ്പാക്കാനും ഇന്ത്യന്‍ റെയില്‍വേയുടെ പുതിയ ആപ്ലിക്കേഷൻ സൗകര്യമൊരുക്കുന്നു.