Bharat Taxi: അമിത് ഷാ ഫ്ലാഗ് ഓഫ് ചെയ്യുന്ന ഭാരത് ടാക്സി; ഊബറിനും ഓലയ്ക്കും വെല്ലുവിളിയാകാൻ സർക്കാർ പിന്തുണയുള്ള സഹകരണ സംരംഭം| Amit Shah to Launch Bharat Taxi Indias First Cooperative Ride-Hailing App to Rival Uber and Ola | ഇന്ത്യ വാർത്ത

കേന്ദ്ര സഹകരണ മന്ത്രാലയത്തിന്റെ പിന്തുണയോടെ ‘സഹകാർ ടാക്സി കോഓപ്പറേറ്റീവ് ലിമിറ്റഡ്’ ആണ് ഈ സേവനം നടത്തുന്നത്. അമുലിന്റെ മുൻനിര പ്രവർത്തകരാണ് ഇതിന് പിന്നിൽ പ്രവർത്തിക്കുന്നത്. ഡ്രൈവർമാരെ ചൂഷണങ്ങളിൽ നിന്ന് സംരക്ഷിക്കുകയും അവർക്ക് മികച്ച വരുമാനം ഉറപ്പാക്കുകയുമാണ് ഈ സഹകരണ മാതൃകയുടെ ലക്ഷ്യം.

ഭാരത് ടാക്സി ഒരു സഹകരണ മാതൃകയിലാണ് പ്രവർത്തിക്കുന്നത്. ഇവിടെ ഡ്രൈവർമാർ വെറും പങ്കാളികളല്ല, മറിച്ച് ഉടമസ്ഥരാണ്. ഓരോ ഡ്രൈവർക്കും സഹകരണ സംഘത്തിൽ അഞ്ച് ഓഹരികൾ വീതം ഉണ്ടായിരിക്കും

സ്വകാര്യ ടാക്സികളെ അപേക്ഷിച്ച് ഭാരത് ടാക്സിയിൽ യാത്രാനിരക്ക് 30 ശതമാനം വരെ കുറവായിരിക്കുമെന്ന് അധികൃതർ അവകാശപ്പെടുന്നു. സ്വകാര്യ കമ്പനികൾ ഓരോ യാത്രയ്ക്കും 30 മുതൽ 50 രൂപ വരെ കമ്മീഷൻ ഈടാക്കുമ്പോൾ, ഭാരത് ടാക്സി ആ തുക ഒഴിവാക്കി ആ ലാഭം നേരിട്ട് യാത്രക്കാർക്ക് കുറഞ്ഞ നിരക്കായി നൽകുന്നു.

ആപ്പിൽ തന്നെ സുരക്ഷാ സംവിധാനങ്ങളും പ്രത്യേക ഹെൽപ്പ് ലൈനും സജ്ജമാക്കിയിട്ടുണ്ട്. യാത്രക്കാരുടെ പരാതികൾ വേഗത്തിൽ പരിഹരിക്കുന്നതിനായി ഡൽഹി പോലീസുമായി സഹകരിച്ച് 35 പ്രത്യേക ബൂത്തുകൾ സ്ഥാപിച്ചു. ‘സാരഥികൾ’ എന്ന് വിളിക്കപ്പെടുന്ന ഡ്രൈവർമാരുടെ പശ്ചാത്തലം പൂർണമായും പരിശോധിച്ച ശേഷമാണ് അവരെ പ്ലാറ്റ്‌ഫോമിൽ ഉൾപ്പെടുത്തുന്നത്.

സഹകാർ ടാക്സി കോഓപ്പറേറ്റീവ് ലിമിറ്റഡ് ആണ് ഭാരത് ടാക്സി നിയന്ത്രിക്കുന്നത്. ഇഫ്‌കോ (IFFCO), അമുൽ (Amul), നബാർഡ് (NABARD), നാഫെഡ് (NAFED) തുടങ്ങിയ രാജ്യത്തെ പ്രമുഖ സഹകരണ സ്ഥാപനങ്ങളുടെ പിന്തുണ ഇതിനുണ്ട്.

ഡൽഹിയിലും ഗുജറാത്തിലും നടത്തിയ പരീക്ഷണാടിസ്ഥാനത്തിലുള്ള പ്രവർത്തനം വലിയ വിജയമായിരുന്നു. പ്രതിദിനം ശരാശരി 5,500 യാത്രകൾ ഇവിടെ നടക്കുന്നുണ്ട്. അടുത്ത രണ്ട് വർഷത്തിനുള്ളിൽ ഭാരത് ടാക്സി സേവനം ഇന്ത്യയിലെ എല്ലാ സംസ്ഥാനങ്ങളിലേക്കും നഗരങ്ങളിലേക്കും വ്യാപിപ്പിക്കാനാണ് ലക്ഷ്യമിടുന്നത്. ഇതിനോടൊപ്പം ഡ്രൈവർമാർക്ക് സാമൂഹിക സുരക്ഷാ പദ്ധതികളും ഇൻഷുറൻസ് പരിരക്ഷയും ഉറപ്പാക്കും.