കർണാടകയിലെ ഹാസനിൽ ഹൃദയാഘാതത്തെ തുടർന്ന് 35 ദിവസത്തിനിടെ 23 മരണം; അന്വേഷണത്തിന് ഉത്തരവ്| Karnataka orders probe on Heart Attack Deaths Continue In Hassan
Last Updated:
മെയ് 28 നും ജൂൺ 29 നും ഇടയിൽ 18 മരണങ്ങളും ജൂൺ 30 നും ജൂലൈ 1 നും ഇടയിൽ അഞ്ച് മരണങ്ങളും റിപ്പോർട്ട് ചെയ്യപ്പെട്ടു
കർണാടകയിലെ ഹാസൻ ജില്ലയിൽ ഹൃദയാഘാത മരണങ്ങളുടെ പരമ്പര തുടരുന്നു. മെയ് 28 നും ജൂൺ 29 നും ഇടയിലുള്ള ഒരു മാസത്തിനുള്ളിൽ 18 പേർ മരിച്ചതായി സർക്കാർ കണക്കുകൾ പറയുന്നു. ജൂൺ 30 നും ജൂലൈ 1 നും ഇടയിൽ കുറഞ്ഞത് അഞ്ച് മരണങ്ങൾ കൂടി റിപ്പോർട്ട് ചെയ്യപ്പെട്ടിട്ടുണ്ട്. ജീവൻ നഷ്ടമായവരിൽ കൂടുതലും യുവാക്കളെന്നതും ആശങ്ക വർധിപ്പിക്കുന്നു.
തിങ്കളാഴ്ച വൈകിട്ട് ഹോളേനരസിപുര താലൂക്കിലെ സോമനഹള്ളി ഗ്രാമത്തിലെ താമസക്കാരനായ 30 കാരൻ സഞ്ജയ് രക്തസമ്മർദം കൂടിയതിനെ തുടർന്ന് ഹൃദയാഘാതത്തെ തുടർന്ന് മരിച്ചു. നെഞ്ചുവേദനയും നടക്കാൻ കഴിയാത്ത അവസ്ഥയും അനുഭവപ്പെട്ടപ്പോൾ സഞ്ജയ് ഒരു പാർട്ടിയിൽ ആയിരുന്നു. സുഹൃത്തുക്കൾ ഉടൻ അദ്ദേഹത്തെ സോമനഹള്ളി പ്രാഥമികാരോഗ്യ കേന്ദ്രത്തിലേക്ക് കൊണ്ടുപോയി. അവിടെ പരിശോധിച്ചപ്പോൾ രക്തസമ്മർദ്ദം 220 mmHg ആയതിനാൽ വിപുലമായ ചികിത്സയ്ക്കായി റഫർ ചെയ്യാൻ ശ്രമിച്ചെങ്കിലും സഞ്ജയ് ദാരുണമായി മരിച്ചു. രണ്ടര മാസം മുൻപായിരുന്നു യുവാവിന്റെ വിവാഹം. ബന്ധുക്കൾ ദുരൂഹതയുണ്ടെന്ന് സംശയം പ്രകടിപ്പിച്ചതിനെ അസ്വാഭാവിക മരണത്തിന് പൊലീസ് കേസ് രജിസ്റ്റർ ചെയ്തു.
ഹാസനിലെ കൊമ്മെനഹള്ളിയിൽ നിന്നുള്ള 22 വയസ്സുള്ള അക്ഷിത ഹൃദയാഘാതത്തെ തുടർന്ന് മരിച്ചു. ഒന്നര മാസം മുമ്പ് പ്രസവിച്ച യുവതി പ്രസവാനന്തര പരിചരണത്തിനായി ശിവമോഗയിലെ അയനൂരിലുള്ള തന്റെ മാതൃ വീട്ടിലായിരുന്നു.തിങ്കളാഴ്ച രാത്രി അക്ഷിതയ്ക്ക് നെഞ്ചുവേദന അനുഭവപ്പെടുകയും ഹാസനിലുള്ള ഭർത്താവിനെ അങ്ങോട്ടേക്ക് വരാൻ വിളിക്കുകയും ചെയ്തു. ആംബുലൻസിൽ ആശുപത്രിയിലേക്ക് കൊണ്ടുപോകുന്നതിനിടെ യുവതി മരിച്ചു.
2025 മെയ് 28 നും ജൂൺ 29 നും ഇടയിൽ റിപ്പോർട്ട് ചെയ്യപ്പെട്ട 18 മരണങ്ങളെക്കുറിച്ചുള്ള പ്രാഥമിക വിവരം ഞെട്ടിക്കുന്നതാണ്. 20 വയസ്സിന് താഴെയുള്ള നാല് പേര്‍ (രണ്ട് പുരുഷന്മാർ, രണ്ട് സ്ത്രീകൾ), 21 നും 29 നും ഇടയിൽ പ്രായമുള്ള ഒരു സ്ത്രീ, 30 നും 40 നും ഇടയിൽ പ്രായമുള്ള അഞ്ച് പുരുഷന്മാർ, 41 നും 59 നും ഇടയിൽ പ്രായമുള്ള ഏഴ് പുരുഷന്മാർ, 60 ന് മുകളിലുള്ള ഒരു പുരുഷൻ എന്നിങ്ങനെയാണ് കണക്ക്.
ഈ ആശങ്കാജനകമായ പ്രവണതയുടെ വെളിച്ചത്തിൽ, ജൂൺ 30 ന് ഹാസൻ ജില്ലാ കളക്ടറുടെ ഓഫീസിൽ ഒരു ഉന്നതതല യോഗം വിളിച്ചുചേർത്തു. ആരോഗ്യ, കുടുംബക്ഷേമ വകുപ്പ് സർക്കാർ പ്രിൻസിപ്പൽ സെക്രട്ടറിയുടെ അധ്യക്ഷതയിൽ നടന്ന യോഗത്തിൽ ശ്രീ ജയദേവ ഇൻസ്റ്റിറ്റ്യൂട്ട് ഓഫ് കാർഡിയോവാസ്കുലർ സയൻസസ് ഡയറക്ടർ, ഹാസൻ ജില്ലാ ആരോഗ്യ, കുടുംബക്ഷേമ ഓഫീസർ, ജില്ലാ സർജൻ, മെഡിക്കൽ സൂപ്രണ്ട്, ജില്ലാ സർവൈലൻസ് ഓഫീസർ തുടങ്ങിയ പ്രധാന മെഡിക്കൽ പ്രൊഫഷണലുകൾ പങ്കെടുത്തു.
അടിയന്തര ചർച്ചകളിൽ, പ്രതിസന്ധി പരിഹരിക്കുന്നതിന് നിർണായക നിർദ്ദേശങ്ങൾ പുറപ്പെടുവിച്ചു. റിപ്പോർട്ട് ചെയ്യപ്പെട്ട ഓരോ ഹൃദയാഘാത മരണത്തിന്റെയും വസ്തുതാപരമായ സാഹചര്യങ്ങൾ അന്വേഷിക്കാൻ ഒരു ജില്ലാതല സമിതിയെ ചുമതലപ്പെടുത്തിയിട്ടുണ്ട്. കൂടാതെ, ശ്രീ ജയദേവ ഇൻസ്റ്റിറ്റ്യൂട്ട് ഓഫ് കാർഡിയോവാസ്കുലർ സയൻസസിന്റെ ഡയറക്ടറുടെ അധ്യക്ഷതയിൽ പ്രവർത്തിക്കുന്ന നിലവിലുള്ള ഒരു വിദഗ്ദ്ധ സമിതിയെ, കോവിഡ്-19 അല്ലെങ്കിൽ അതിന്റെ വാക്സിൻ പാർശ്വഫലങ്ങളുമായി ബന്ധപ്പെട്ടേക്കാവുന്ന പെട്ടെന്നുള്ള മരണങ്ങൾ അന്വേഷിക്കാൻ പ്രത്യേകം ചുമതലപ്പെടുത്തിയിട്ടുണ്ട്. ഈ കമ്മിറ്റി 10 ദിവസത്തിനുള്ളിൽ ഒരു സമഗ്ര റിപ്പോർട്ട് സമർപ്പിക്കുമെന്നാണ് പ്രതീക്ഷിക്കപ്പെടുന്നത്.
2023 മാർച്ച് മുതൽ 2025 മെയ് വരെയുള്ള സ്ഥിതിവിവരക്കണക്കുകൾ സൂചിപ്പിക്കുന്നത് ഹൃദയ സംബന്ധമായ അസുഖങ്ങൾക്കായി 37,847 ഇസിജി പരിശോധനകൾ നടത്തിയെന്നാണ്. ഇതിൽ 795 കേസുകളിൽ 480 എണ്ണം ഹൃദയാഘാതമായി സ്ഥിരീകരിച്ചു. 420 രോഗികൾക്ക് വിജയകരമായ ചികിത്സ നൽകി. 60 രോഗികളെ രക്ഷിക്കാനായില്ല.
Hassan,Hassan,Karnataka
July 02, 2025 11:35 AM IST